Fleiri uppskriftir að teppum í fyrirburastærðum eru í vinnslu. Hér eru nokkrar einfaldar uppskriftir að fyrirburateppum.
Stærðir fyrirburateppa
Stærðir á fyrirburateppum eru um 30 x 50 cm, 50 x 50 cm, 50 x 70 cm, eða 70 x 100 cm.
Minnstu teppin eru notuð á Vökudeild. Þess vegna þurfa þau að vera úr bómull sem má þvo á 60°C (fyrir sótthreinsun). Stærri teppin mega vera úr bómull, merínóull (lanett), bambus og öðru mjúku, náttúrulegu garni. (Engin gerviefni.)
Stærri teppin eru oftast úr bómull eða merínóull (sem má þvo á 30°, 40° eða 60°C).
Einfaldar uppskriftir
Lítið bómullarteppi (50 cm breitt)
Fitja upp 130-140 lykkjur. Prjónastærð 3 – 3,5 (60-80 cm hringprjónn). Bómullargarn (sjá neðar).
Garðaprjón (prjónað slétt fram og til baka) eða munstur að eigin vali.
Mjúkt teppi úr merínóull
Lanett, prjónastærð 4,5 (60-80 cm hringprjónn).
Garðaprjón (prjónað slétt fram og til baka).
Lykkjufjöldi:
50 cm breidd = 110 lykkjur
70 cm breidd = 150 lykkjur
90 cm breidd = 190 lykkjur
Röndótt teppi úr merínóull
Lanett, prjónastærð 3,5 (60-80 cm hringprjónn).
130 lykkjur = 50 cm breidd. Garðaprjón.
Röndótt munstur: Bleikt 4 umf., *hvítt 5 umf., ljósgrátt 2 umf., hvítt 5 umf., bleikt 2 umf., hvítt 1 umf., bleikt 1 umf., lj.grátt 1 umf., hvítt 5 umf., lj.grátt 2 umf., hvítt 1 umf., bleikt 3 umf., lj.grátt 1 umf.,* Endurtaka *-* og enda á bleiku 4 umf. Hægt að brjóta munstrið meira upp með því að prjóna 1 lit stundum á röngunni eða bara 1/2 umferð.
Litir & prjón
Það er alltaf gaman að sjá fyrirbura eða ungbörn með teppi í glaðlegum litum eða náttúrulitum. Veldu þá liti sem þér finnst fallegastir og leiktu þér að því að blanda saman litum.
Fyrir tvílitt röndótt teppi, kemur vel út að hafa 10 umferðir í aðallit og 7 umferðir í aukalit (t.d. blátt og brúnt). Eða marga liti og prjóna hvern lit 1-3 umferðir. Allt teppið í garðaprjóni. Hægt að hafa heklaðan kant í kring eða snúrukant.
Hvaða garn má nota
Bómull sem þolir 60° þvott
Mandarin Naturell — Mandarin Petit — Cotton 8/8 — Garnið í Søstrene Grene
Minnstu teppin þurfa helst að vera úr bómull sem má þvo á 60°C, svo það sé hægt að sótthreinsa þau á Vökudeild. Sérstaklega stærðir 30 x 50 og 50 x 50 cm (eða í samráði við foreldra).
Foreldrar sjá um að þvo teppi sem má ekki sótthreinsa (sem þola ekki 60°). Þau teppi eru fyrir stærri fyrirbura og er líka hægt að nota eftir útskrift.
Gerviefni eru ekki á óskalistanum því húð fyrirbura er svo viðkvæm.
Merínóull, bambus (30-40°)
Lanett — Dale Baby Ull — DROPS Baby Merino — Sunday PetitKnit — Klompelompe
Lanett er eitt vinsælasta garnið — Mjög mjúkt, slitsterkt, stingur ekki. Teppin geta enst mörg ár.
Bambus og bambus-blöndur eru mjúk, náttúruleg efni.*
*Athugasemd vegna bambus. Bambus er stundum sagt vera með náttúrulega sótthreinsandi eiginleika. En það á bara við ef um er að ræða garn sem er unnið án kemískra efna. Þetta er mjög sjaldgæft garn en er þá merkt „ómeðhöndlað“ eða „vélaunnið,“ „Bamboo linen“ eða „mechanically processed bamboo.“ Algengast er að bambusgarn sé unnið með kemískum efnum (viscose og rayon).
Kolkrabbi & fyrirburateppi
Fyrir fallega sængurgjöf er hægt að hekla kolkrabba í stíl við prjónað teppi. Sama bómullargarn hentar í kolkrabba og teppi, sem þurfa að þola 60° þvott.
Stærðir fyrirbura
Minnstu fyrirburarnir geta verið um 23-32 cm að lengd. Teppi fyrir þá geta verið 30 x 50 eða 20 x 30 cm og verða að vera úr 100% bómull sem má þvo á 60°.
Minnsta húfustærðin (26) passar á fyrirbura sem eru ca. 23-30 cm.
Lumar þú á fyrirbura-uppskrift sem þú vilt deila? Það vantar alltaf góðar flíkur á fyrirbura, sérstaklega húfur og teppi.